Расследуем карупцыю, выкрываем фэйкі, аналізуем навінавую павестку. БРЦ — чалец глабальнай сеткі журналістаў-расследавальнікаў.
Журналісты БРЦ – лаўрэаты нацыянальнай прэміі «Вольнае слова» Беларускай асацыяцыі журналістаў за расследаванні ў 2018, 2019, 2020, 2021 і 2022 гадах. На «Вольным слове» у 2021 годзе каманда БРЦ атрымала першае месца ў катэгорыі «Аналітыка».
БРЦ з'яўляецца чальцом OCCRP (Цэнтр па даследаванні карупцыі і арганізаванай злачыннасці)
Таксама мы чальцы GIJN (Глабальная сетка журналістаў расследавальнікаў)
Хто каму пагражае? Экс-прэм'ер Украіны параўнаў абаронныя бюджэты Расеі і ЕЗ, але памыліўся ў сумах
Палітык заявіў, што Еўразвяз у 2025 годзе вылучыць на пераўзбраенне арміі трыльён еўра.
Еўразвяз і Кіеў пагражаюць Расеі: кіраўнікі заходніх краін запланавалі ў 2025 годзе вылучыць на пераўзбраенне арміі ЕЗ трыльён еўра, заявіў былы прэм'ер-міністр Украіны Мікалай Азараў. Каманда Weekly Top Fake праверыла, на колькі ён аблічыўся.
У вайсковай пагрозе Расеі былы прэм'ер-міністр Украіны Мікалай Азараў звінаваціў краіны Еўразвязу 14 траўня 2025 года ў эфіры праекту «У тэме» на ютуб-канале інфармацыйнага агенцтва БелТА.
«Яны запланавалі, я маю на ўвазе заходнія кіраўнікі, трыльён вылучыць на 2025 год на пераўзбраенне арміі еўрапейскіх краін. Трыльён! Гэта ў 15 разоў больш, чым абарончы бюджэт Расеі. Узнікае законнае пытанне: хто каму пагражае? Значыць, ці то Расея з 70-мільярдным бюджэтам, ці то вы з трыльённым бюджэтам?» — задаўся пытаннем экс-прэм'ер.
Па афіцыйных дадзеных Міністэрства фінансаў РФ, выдаткі на абарону ў федэральным бюджэце Расеі на 2025 год удвая большыя за агучаныя — 13,5 трлн рублёў ці каля €150 млрд. Гэта прыблізна 6,5% ВУП Расеі.
Ува ўсіх краінах ЕЗ разам узятых вайсковы бюджэт летась не дасягнуў 2% агульнага ВУП Еўразвязу і склаў крыху больш за €320 млрд. У 2025-м ЕЗ пачаў абмяркоўваць павелічэнне выдаткаў, але не да трыльёну еўра. Еўразвяз плануе да існуючых выдаткаў дадаць яшчэ €800 млрд. Але за 4 гады, а не за адзін, то бок да 2030-га. Але нават у гэтым выпадку выдаткі вырастуць толькі да 3,5% ад чаканага ВУП Еўразвязу супраць цяперашніх 6% з лішнім у РФ.
